വാഹനാപകടത്തില് പരിക്കേറ്റ ഇന്ത്യന് ക്രിക്കറ്റ് താരം ഋഷഭ് പന്തിന് ആറ് മാസത്തോളം ഗ്രൗണ്ടില് നിന്ന് വിട്ടുനില്ക്കേണ്ടി വന്നേക്കും. ഇതുമൂലം ഐപിഎല് സീസണും ഓസ്ട്രേലിയന് പരമ്പരയും പന്തിന് നഷ്ടമാവും. പരിക്ക് ഭേദമാവാന് മൂന്ന് മുതല് ആറ് മാസം വരെ വേണ്ടി വരുമെന്നാണ് സൂചന. രണ്ട് മുറിവുകളാണ് പന്തിന്റെ തലയിലുള്ളത്. വലത് കാല്മുട്ടിലെ എല്ലുകള്ക്ക് പരിക്കുണ്ട്. വലത് കൈവെള്ളയിലും കണങ്കാലിലും പാദത്തിലും പരിക്കേറ്റിട്ടുണ്ടെന്നാണ് മെഡിക്കല് ബുള്ളറ്റിനില് അറിയിച്ചിരിക്കുന്നത്.
കാല്മുട്ടിലെ എല്ലുകള്ക്ക് ഏറ്റ ക്ഷതം ഗുരുതരമാണ് എങ്കില് തിരികെ വരാന് വീണ്ടും സമയമെടുക്കും. ഫെബ്രുവരി ഒമ്പതിനാണ് ഓസ്ട്രേലിയക്കെതിരായ ടെസ്റ്റ് പരമ്ബര ആരംഭിക്കുന്നത്. കഴിഞ്ഞ രണ്ട് വട്ടവും ഓസീസ് പര്യടനത്തില് പന്തിന്റെ പ്രകടനം ഇന്ത്യക്ക് നിര്ണായകമായിരുന്നു. ലോക ടെസ്റ്റ് ചാമ്പ്യന്ഷിപ്പ് ഫൈനല് സാധ്യതകള് നിര്ണയിക്കുന്ന ടെസ്റ്റ് പരമ്പരയില് പന്തിന്റെ അസാന്നിധ്യം ഇന്ത്യക്ക് തിരിച്ചടിയാണ്. നിലവില് ഐപിഎല്ലില് ഡല്ഹി ക്യാപിറ്റല്സിന്റെ ക്യാപ്റ്റനാണ് പന്ത്.
