ചാള്സ് രാജാവിനും പത്നി കാമിലയ്ക്കും നേരെ മുട്ടയേറ്
ലണ്ടനിലെ യോര്ക്കില് ചാള്സ് രാജാവിനും പത്നി കാമിലയ്ക്കും നേരെ മുട്ടയേറ്. 23 കാരനായ പ്രതിയെ പോലീസ് അറസ്റ്റ് ചെയ്തു. യോര്ക്ക് യൂണിവേഴ്സിറ്റി വിദ്യാര്ത്ഥിയാണ് രാജാവിന് നേരെ മുട്ടയെറിഞ്ഞത്. എന്നാല് മുട്ടകള് രാജാവിന്റെയും പത്നിയുടെയും ശരീരത്തില് പതിച്ചില്ല. പൊതു ക്രമസമാധാനം തടസപ്പെടുത്തിയെന്ന കുറ്റം ചുമത്തിയാണ് അറസ്റ്റ്. അടിമകളുടെ രക്തത്തില് കെട്ടിപ്പടുത്തതാണ് ഈ രാജ്യമെന്നും എന്റെ രാജാവല്ലെന്നും ആക്രോശിച്ചായിരുന്നു പ്രതിഷേധം.
സംഭവത്തില് യൂണിവേഴ്സിറ്റി ഖേദം പ്രകടിപ്പിച്ചു. ചിത്രങ്ങള് കണ്ട് ഞെട്ടിയെന്നും തെറ്റായ പെരുമാറ്റമായി കണ്ട് സംഭവം അവലോകനം ചെയ്യുമെന്നും അധികൃതര് വ്യക്തമാക്കിയതായി ബിബിസി റിപ്പോര്ട്ട് ചെയ്തു.
ബ്രിട്ടനെ ഏറ്റവും ദൈര്ഘ്യമേറിയ കാലം ഭരിച്ച എലിസബത്ത് രാജ്ഞിയുടെ വിയോഗത്തെത്തുടര്ന്ന് സെപ്റ്റംബര് 10-ന് ആയിരുന്നു ചാള്സ് മൂന്നാമന് രാജാവ് അധികാരമേറ്റത്.
