രാഹുല് ഗാന്ധി നയിക്കുന്ന ഭാരത് ജോഡോ യാത്രയുടെ സമാപന സമ്മേളനം ഇന്ന് ശ്രീനഗറില് നടക്കും. 23 കക്ഷികളില് 12 കക്ഷികളുടെ നേതാക്കള് സമ്മേളനത്തില് പങ്കെടുക്കും. സിപിഐഎം, ജെഡിയു, ജെഡിഎസ്, തൃണമൂല് കോണ്ഗ്രസ് തുടങ്ങിയ കക്ഷികള് പങ്കെടുക്കില്ല. പൊലീസ്, കരസേന, സിആര്പിഎഫ് എന്നിവര് വന് സുരക്ഷാ സന്നാഹങ്ങളാണ് ഏര്പ്പെടുത്തിയത്.
ഇന്നലെ രാവിലെ പന്താചൗക്കില് നിന്ന് ആരംഭിച്ച യാത്ര 12 മണിക്ക് ലാല് ചൗക്കിലാണ് അവസാനിച്ചത്. രാഹുല് ഗാന്ധി ദേശീയ പതാക ഉയര്ത്തിയ ചടങ്ങില് പതിനായിരങ്ങള് പങ്കെടുത്തു. 136 ദിവസം കൊണ്ട് 4080 കിലോമീറ്റര് പിന്നിട്ടാണ് യാത്ര ശ്രീനഗറിലെത്തിയത്. സെപ്റ്റംബര് ഏഴിന് കന്യാകുമാരിയില്നിന്ന് തുടങ്ങിയ യാത്ര 12 സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളുമായി 75 ജില്ലകളിലൂടെ യാത്ര കടന്നുപോയി. യാത്ര പിന്നിട്ടത് 4080 കിലോമീറ്റർ.
