ബ്രഹ്മപുരം മാലിന്യ പ്ലാന്റിലുണ്ടായ തീപിടിത്തത്തെ തുടര്ന്ന് മാലിന്യക്കൂമ്പാരത്തിലെ പുക ശമിപ്പിക്കുന്നതിന് വ്യോമസേനയുടെ ഹെലികോപ്ടറുകളില് നിന്ന് വെള്ളം സ്പ്രേ ചെയ്യുന്ന പ്രവര്ത്തനങ്ങള് നാളെ മുതല് ആരംഭിക്കുമെന്ന് ജില്ലാ കളക്ടര് ഡോ. രേണു രാജ്.
വ്യോമസേനയുടെ സൊലൂര് സ്റ്റേഷനില് നിന്നുളള ഹെലികോപ്ടറുകളാണ് മുകളില് നിന്ന് വെള്ളം പമ്പ് ചെയ്യുന്നതിന് ഉപയോഗിക്കുക. ബ്രഹ്മപുരം മാലിന്യ പ്ലാന്റിലുണ്ടായ തീപിടിത്തത്തെ തുടര്ന്ന് മാലിന്യക്കൂമ്പാരത്തിലെ തീ പൂര്ണ്ണമായി അണയ്ക്കാന് കഴിഞ്ഞു. മാലിന്യത്തിന്റെ അടിയില് നിന്ന് പുക ഉയരുന്ന സാഹചര്യമുണ്ട്. ഇത് ശമിപ്പിക്കുന്നതിന് നാലു മീറ്റര് വരെ താഴ്ചയില് മാലിന്യം ജെസിബി ഉപയോഗിച്ച് നീക്കി വലിയ പമ്പ് ഉപയോഗിച്ച് വെള്ളം പമ്പ് ചെയ്യുന്ന പ്രവര്ത്തനങ്ങളാണ് പുരോഗമിക്കുന്നത്.
നിലവില് 30 ഫയര് ടെന്ഡറുകളും 125 അഗ്നിരക്ഷാ സേനാംഗങ്ങളുമാണ് സേവനരംഗത്തുള്ളത്. ഒരു മിനിറ്റില് 60000 ലിറ്റര് വെള്ളം പമ്പ് ചെയ്യുന്നുണ്ട്. ഇതിനു പുറമേ നേവിയുടെ എയര് ഡ്രോപ്പിംഗ് ഓപ്പറേഷനും നടക്കുന്നുണ്ട്. നേവിയുടെ ഓപ്പറേഷന് നാളെയും തുടരും.
കഴിഞ്ഞ നാലു ദിവസമായി തീയണയ്ക്കുന്നതുമായി ബന്ധപ്പെട്ട് പ്രവര്ത്തിക്കുന്ന ജീവനക്കാരുടെ ആരോഗ്യ സംരക്ഷണം ഉറപ്പാക്കുന്നതിനുള്ള നടപടിയും സ്വീകരിച്ചു. ഇതിനായി നാളെ എറണാകുളം ജനറല് ആശുപത്രിയില് നിന്നുള്ള മെഡിക്കല് സംഘമെത്തി ബ്രഹ്മപുരത്ത് ക്യാംപ് ചെയ്ത് ജീവനക്കാരുടെ വൈദ്യപരിശോധന നടത്തും.
വായുവിന്റെ ഗുണനിലവാരവുമായി ബന്ധപ്പട്ട് ആശങ്കപ്പെടേണ്ടതില്ല. കഴിഞ്ഞ ദിവസത്തേതില് നിന്ന് വാല്യു കുറഞ്ഞു വരുന്നുണ്ട്. ഇന്ന് ഉച്ചയ്ക്ക് വൈറ്റില സ്റ്റേഷനില് 146, എലൂര് സ്റ്റേഷനില് 92 മാണ് പര്ട്ടിക്കുലേറ്റ് മാറ്ററിന്റെ തോത് കാണിക്കുന്നത്. നിലവില് അന്തരീക്ഷ മലിനീകരണവുമായി ബന്ധപ്പെട്ട് ഭയപ്പെടേണ്ട സാഹചര്യമില്ല. എങ്കിലും മുന്കരുതലിന്റെ ഭാഗമായി ശ്വാസകോശ രോഗമുള്ളവര്, ഗര്ഭിണികള്, മുതിര്ന്നവര് തുടങ്ങിയവര് പ്രത്യേകം ജാഗ്രത പാലിക്കണമെന്നും കളക്ടര് പറഞ്ഞു. ഇന്ന് രാത്രിയും പുക ശമിപ്പിക്കുന്നതിനുള്ള പ്രവര്ത്തനങ്ങള് തുടരും. ഇതിനുള്ള സജ്ജീകരണങ്ങള് പൂര്ത്തിയായി വരികയാണ്.
സ്കൂള് അവധി-ജില്ലാ കളക്ടറുടെ അറിയിപ്പ്
ബ്രഹ്മപുരം മാലിന്യശേഖരണ പ്ലാന്റില് ഉണ്ടായ തീപിടിത്തത്തെ തുടര്ന്ന് ആരോഗ്യപരമായ മുന്കരുതലിന്റെ ഭാഗമായി വടവുകോട് – പുത്തന്കുരിശ് ഗ്രാമപഞ്ചായത്ത്, കിഴക്കമ്പലം ഗ്രാമപഞ്ചായത്ത്, കുന്നത്തുനാട് ഗ്രാമപഞ്ചായത്ത്, തൃക്കാക്കര മുനിസിപ്പാലിറ്റി, തൃപ്പൂണിത്തുറ മുനിസിപ്പാലിറ്റി, മരട് മുനിസിപ്പാലിറ്റി, കൊച്ചി മുനിസിപ്പല് കോര്പ്പറേഷന് എന്നീ തദ്ദേശ സ്ഥാപനങ്ങളിലെ അങ്കണവാടികള്, കിന്റര്ഗാര്ട്ടണ്, ഡേ കെയര് സെന്ററുകള് എന്നിവയ്ക്കും സര്ക്കാര്, എയ്ഡഡ്, അണ് എയ്ഡഡ്, സിബിഎസ്ഇ, ഐസിഎസ്ഇ സ്കൂളുകളിലെ ഒന്നു മുതല് ഏഴു വരെയുള്ള ക്ലാസുകളിലെ വിദ്യാര്ത്ഥികള്ക്കും നാളെ (07-03-2023) അവധിയായിരിക്കും. പൊതു പരീക്ഷകള്ക്ക് മാറ്റമില്ല.
