ഒരു ദിവസം മുമ്പ് കൈക്കൂലി വാങ്ങുന്നതിനിടെ പിടിക്കപ്പെട്ട കർണാടക ബിജെപി എംഎൽഎയുടെ മകൻ്റെ വീട്ടിൽ നടത്തിയ പരിശോധനയിൽ 6 കോടിയോളം രൂപ കണ്ടെടുത്തതായി ഉദ്യോഗസ്ഥർ അറിയിച്ചു. ബി.ജെ.പി എം.എൽ.എ മാദൽ വിരൂപാക്ഷപ്പയുടെ മകൻ പ്രശാന്ത് മദാലിൻ്റെ വീട്ടിൽ ലോകായുക്തയുടെ അഴിമതി വിരുദ്ധ വിഭാഗം നടത്തിയ റെയ്ഡിൽ വൻ കള്ളപ്പണം കണ്ടെത്തി.
സർക്കാർ ഉടമസ്ഥതയിലുള്ള കർണാടക സോപ്പ് ആൻഡ് ഡിറ്റർജൻ്റ് ലിമിറ്റഡിൻ്റെ (കെഎസ്ഡിഎൽ) ചെയർമാനാണ് മാദൽ വിരൂപാക്ഷപ്പ. ഇവിടെ മൈസൂർ സാൻഡൽ സോപ്പ് നിർമ്മിക്കുന്നു. അദ്ദേഹത്തിൻ്റെ മകൻ ബെംഗളൂരു വാട്ടർ സപ്ലൈ ആൻഡ് സ്വീവറേജ് ബോർഡിൽ ചീഫ് അക്കൗണ്ടൻ്റാണ്.
ബി.ജെ.പി എം.എൽ.എ എം.വിരൂപാക്ഷപ്പയുടെ മകനെ 40 ലക്ഷം രൂപ കൈക്കൂലി വാങ്ങുന്നതിനിടെ ലോകായുക്ത ഉദ്യോഗസ്ഥർ വ്യാഴാഴ്ച അറസ്റ്റ് ചെയ്തു. ബെംഗളൂരുവിലെ പിതാവിൻ്റെ ഓഫീസായ കർണാടക സോപ്പ് ആൻഡ് ഡിറ്റർജൻ്റ് ലിമിറ്റഡിൽ നിന്നാണ് പ്രശാന്ത് കുമാറിനെ അറസ്റ്റ് ചെയ്തതെന്ന് ലോകായുക്ത വൃത്തങ്ങൾ അറിയിച്ചു. 80 ലക്ഷം രൂപ കൈക്കൂലിയായി പ്രശാന്ത് ആവശ്യപ്പെട്ടതായി ലോകായുക്ത പൊലീസ് പറഞ്ഞു. കർണാടകയിലെ ദാവൻഗെരെ ജില്ലയിലെ ചന്നഗിരിയിൽ നിന്നുള്ള എംഎൽഎയും കെഎസ്ഡിഎൽ ചെയർമാനുമാണ് പ്രശാന്തിൻ്റെ അച്ഛൻ.
പ്രശാന്തിൻ്റെ പക്കൽ നിന്ന് മൂന്ന് ബാഗുകൾ കണ്ടെടുത്തതായി വൃത്തങ്ങൾ അറിയിച്ചു. 2008 ബാച്ച് കർണാടക അഡ്മിനിസ്ട്രേറ്റീവ് സർവീസ് ഓഫീസറായ പ്രശാന്ത്, സോപ്പുകളും മറ്റ് ഡിറ്റർജൻ്റുകളും നിർമ്മിക്കാൻ ആവശ്യമായ അസംസ്കൃത വസ്തുക്കൾ വാങ്ങുന്നതിനുള്ള കരാറിന് കരാറുകാരനിൽ നിന്ന് കൈക്കൂലി സ്വീകരിക്കുന്നതിനിടെയാണ് പിടിയിലായത്. 80 ലക്ഷം രൂപ ഇയാൾ ആവശ്യപ്പെട്ടതായും കരാറുകാരൻ ലോകായുക്തയിൽ ഒരാഴ്ച മുമ്പ് പരാതി നൽകിയതിനെ തുടർന്നാണ് പ്രശാന്തിനെ കുടുക്കാൻ പദ്ധതിയിട്ടതെന്നും പറയുന്നു.
