എം. ശിവശങ്കര് വിരമിച്ചു; പടിയിറക്കം യാത്രയയപ്പ് ചടങ്ങിന്റെ പതിവ് ചിട്ടവട്ടങ്ങളൊന്നുമില്ലാതെ
മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കര് വിരമിച്ചു.
യാത്രയയപ്പ് ചടങ്ങിന്റെ പതിവ് ചിട്ടവട്ടങ്ങളൊന്നുമില്ലാതെയായിരുന്നു എം ശിവശങ്കറിന്റെ പടിയിറക്കം. പിന്ഗാമിയായി സര്ക്കാര് നിശ്ചയിച്ച പ്രണവ് ജ്യോതികുമാറിന് എം. ശിവശങ്കര് ചുമതലകള് കൈമാറി.
കായിക യുവജനക്ഷേമ വകുപ്പ് സെക്രട്ടറിയായിരുന്ന എം ശിവശങ്കര് അവസാന പ്രവര്ത്തിദിനത്തില് ഉച്ചയോടെയാണ് സെക്രട്ടേറിയറ്റ് അനക്സിലെ ഓഫീസിലെത്തിയത്. ഉദ്യോഗസ്ഥരുമായി സൗഹൃദ കൂടിക്കാഴ്ചകള്, അടിയന്തരമായി തീര്ക്കേണ്ട ചില ഫയല് നോട്ടങ്ങള് എന്നിവ മാത്രമാണ് നടന്നത്.
രണ്ട് ദിവസം മുന്പ് വകുപ്പിലെ ഉദ്യോഗസ്ഥരെല്ലാം ചേര്ന്ന് എം ശിവശങ്കറിന് സ്നേഹോപഹാരം നല്കിയിരുന്നു.
ഐഎഎസ് അസോസിയേഷന്റെ യാത്രയയപ്പ് ചടങ്ങ് നിരസിച്ചു. കായിക യുവജനക്ഷേമ വകുപ്പ് മന്ത്രിമാര് സ്ഥലത്തുണ്ടായിരുന്നില്ല. മൃഗസംരക്ഷണ വകുപ്പ് മന്ത്രി ജെ. ചിഞ്ചുറാണിയെ ഓഫീസിലെത്തി കണ്ടു. മുഖ്യമന്ത്രി പിണറായി വിജയന്റെ ഓഫീസില് പ്രതാപത്തോടെ വാണ എം ശിവശങ്കര് അവസാന പ്രവര്ത്തി ദിനം ആരവങ്ങളില്ലാതെ പൂര്ത്തിയാക്കി സെക്രട്ടേറിയറ്റിന്റെ പടിയിറങ്ങി.
